કોઈને કહેતા નૈ

વાત છે આ સાવ અંગત, કોઈને કે’તા નહી.

લ્યો, પડી છે આપની લત કોઈને કે’તા નહી.

આયના હારી ગયા છે એકસો ને આઠ વાર,
સાદગીનું એટલું સત, કોઈને કે’તા નહી.

આપની બસ યાદમાં ટીપુંયે લોહી ક્યા બચ્યું?
આજ શાહીથી લખ્યો ખત, કોઈને કે’તા નહી.

શ્વાસથી નખશીખ નવડાવી પ્રથમ ને એ પછી,
આંખથી એંઠીકરે, ધત્ત, કોઈને કે’તા નહી.

આપની આંખે  રહેવાનું થયું છે આજકાલ,
જોઈ લીધી મેં ય જન્નત,કોઈને કહેતા નહી.

હરદ્વાર ગોસ્વામી