મને એજ સમજાતું નથી કે,
શાને આવું થાય છે !
ડાળો લીલી છેને ફુલો,
કેમ કરમાઈ જાય છે !
એમ તો કેટલાય લોકો,
રોજ ભટકાઈ જાય છે,
તેમ છતાં એક જ ચહેરો,
કેમ છુપાઈ જાય છે !
બધું એમનું એમ ચાલે ને,
વરસો વીતી જાય છે,
તેમ છતાં મારી જ દુનિયા,
કેમ બદલાઈ જાય છે!
સંબંધોને આ દુનિયામાં,
ગરજથી જ મપાય છે,
લાગણીભીના માણસો કેમ,
બેવકુફ સમજાય છે !
દુરથી ડુંગરા બધા બહુ,
રળિયામણા દેખાય છે,
પાસે જઈએ ત્યારે કેમ,
પથ્થરા થઇ જાય છે !
ઉગતા સુરજને પૂજવા સહુ,
કેમ આગળ થાય છે !
સાંજ ઢળે ત્યારે શાને,
પાછળ હટી જાય છે !
એજ સંબંધો, એજ લોકો,
હું પણ એની એજ છું,
તેમ છતાં એકાએક બધાય,
વ્યવહાર બદલાઈ જાય છે !
મને એજ સમજાતું નથી કે,
શાને આવું થાય છે !
રોજ એજ રસ્તો છતાય,
ધબકાર કેમ ચૂકાય છે !
-હિના ત્રિપાઠી
No comments:
Post a Comment