ડુબાડ્યો છે..

મૂળસોતો   મને    ઉખાડ્યો  છે,

ને  પછી  આભમાં  ઉડાડ્યો  છે;

શ્વાસ  ફાગણ  બનીને મહેકાતો,
રંગ  કેવો   તમે   લગાડ્યો  છે !

તે પછી ઊંઘ ના   કદી   આવી,
સ્વપ્નમાં જ્યારથી જગાડ્યો છે;

આવી   ઊંચાઇ   ના કદી આવે,
પ્રેમમાં    કોઇએ    પછાડ્યો  છે;

કૃષ્ણ  ભૂલી   ગયા   વિદુરભાજી,
કાવ્યનો શબ્દ જ્યાં ચખાડ્યો છે;

પૂજશે   સૌ   ચરણકમળ,  એથી,
પંગુને   પર્વતેવ    પુગાડ્યો   છે;

સાત સમદર તરી ગયા પળમાં,
જાતમાં  મેં   મને   ડુબાડ્યો   છે.

- હરદ્વાર ગોસ્વામી